Mari Berdoa untuk Kemanusiaan

Mari Berdoa untuk Kemanusiaan

Rabu, 06 Juni 2012

Yesaya 61:1-11 Kabar Salamat voor Sion


(Bahasa: Manado Melayu)

1  TUHAN Allah pe Roh ada pa kita, karena TUHAN so urapi pa kita; Ia da utus pa kita voor kase bae pa orang-orang sengsara, deng kase bae orang-orang yang saki hati, deng mo kase kabar bebas voor orang-orang nyanda bebas deng voor orang-orang yang dapa kurung di panjara,
2  Kase barita taon rahmat TUHAN, kong hari pembalasan torang pe Allah. Mo kase hibur torang samua barduka.
3  Kase karunia pa dorang perhiasan kapala mo ganti abu, minya mo pake di pesta so ta ganti deng duka, memuji sampe manyanyi so diganti deng semangat yang ilang, kong orang bilang dorang “tabanting itu pohong kabanaran”, “TUHAN pe tanaman” kase lia kabasaran-Nya.
4  Dorang mo bangon gedung yang so rubuh berabad-abad, deng mo kase badiri ulang tampa-tampa dolo yang nyanda ada suara; dorang mo kase badiri ulang itu kota-kota yang so rubuh, tampa-tampa yang lama so jadi sunyi.
5  Banya orang luar mo melayani pa ngana sebagai gembala kambing domba, deng banya orang pendatang mo bakarja pa ngana sebagai petani dan tukang kobong di ngana pe pohong anggur.
6  Maar ngana dorang mo pangge sebagai walian TUHAN deng mo kase nama “pelayan torang pe Allah”. Ngoni mo rasa itu kekayaan banya bangsa kong mo rasa basar diri deng dorang pe harta benda.
7  Maar ngoni mo dapa malo dua kali lebe banya, sebagai ganti noda deng ludah yang ngana mo dapa rasa. Ngoni mo dapa budel dua kali lebe banya di ngoni pe tampa tinggal. Deng sukacita abadi mo jadi ngoni pe punya.
8  Kita, TUHAN, yang cinta hukum, deng binci ba rampas deng ba tipu; qta mo kase upah pa ngoni deng tepat, mo beking perjanjian abadi deng ngoni.
9  Ngoni pe keturunan mo jadi top di samua bangsa, deng ngoni pe anak-anak di samua suku bangsa, sampe samua orang yang ada lia pa dorang akan mo akui kalo dorang itu adalah keturunan yang TUHAN ada berkati.
10  Kita basyukur di dalang TUHAN, kita pe jiwa sanang sakali di dalang Allah, kiapa bagitu? Karena Allah kase pake pakean keselamatan pa kita kong tutup pa kita deng pakean kabasaran kabanaran, noh so sama deng itu pengantin nyong yang pake perhiasan kapala, kong so sama deng itu noni pengantin yang pake depe barang mas.
11  So sama deng bumi kase pancar tu mbuh-tumbuhan, so sama deng kobong kase tumbuh benih kong so ta pancar di tanah, bagitu lei deng TUHAN Allah mo kase tumbuh itu kabanaran dan puji-pujian di muka samua bangsa-bangsa.

Nency A Heydemans Maramis
21:00
6 Juni 2012

Tidak ada komentar: