Paulus pe Surat voor Filemon

(Bahasa: Manado Melayu)

1:1-3 Tabea

1        Kita Paulus, karena Yesus Kristus kita maso panjara deng torang pe sodara Timotius voor Filemon torang pe tamang karja yang torang sayang.

2        Deng voor Apfia torang pe tamang parampuang kong voor Arkhipus, torang pe tamang parjuangan deng voor ngana pe wale jemaah:

3        Pakatuan wo pakalowiren dari Allah, torang pe Bapa deng TUHAN Yesus Kristus salalu baserta deng ngoni.

1:4-7 Pengucapan Syukur

4        Pengucapan syukur kita panjatkan pa Allah, pas kita ta pikir pa ngana dalam doa,

5        Kita dengar ngana pe kasih voor torang samua yang kudus dengan ngana pe iman pa Yesus Kristus.

6        Kita berdoa, agar ngana pe bakumpul dalam iman beking pengetahuan bae pa ngoni deng pa kita voor Kristus.

7        Ngana pe kasih so beking kita ponoh sanang dan rasa kuat, sebab ngana so kase sanang itu orang-orang kudus, kita pe sodara.

1:8-22 Paulus ba minta tolong pa Filemon mengenai Onesimus

8        So kar’na bagitu, biar di dalang Kristus, kita punya hak bebas voor ba p’renta pa ngana apa yang ngana mo beking.

9        Maar dapa inga ngana pe kasih itu, lebe bae kita ba minta pa ngana. Kita, Paulus, yang so tua kasiang, kong lei ba tinggal di panjara kar’na Kristus Yesus,

10    Ba bilang sambil ba minta pa ngana mengenai kita pe anak yang kita dapa di panjara, depe nama Onesimus-

11    Kita tahu noh, dulu dia nyanda barguna pa ngana maar ini noh so barguna pa ngana deng ato pa kita.

12    Dia kita ada p’renta pigi pa ngana - dia kwa kita pe buah hati -.

13    Bagini kwa kita mo tahang pa dia di sini voor ganti pa ngana malayani kita salama hidop di panjara karena Injil,

14    Maar kalo ngana nyanda kase iyo, kita nyanda mo beking noh, supaya yang itu kalakuan bae jang ngoni beking deng ba paksa hati, maar beking deng hati butul-butul tulus.

15    Kong karena bagitu dia tapisa nyanda lama deng ngana, supaya ngoni dapa manarima pa dia salama-lamanya,

16    Bukang lei sebagai hamba maar lebe dari hamba yang so dianggap sodara sandiri torang kasihi, ini so cukup voor kita, deng lebe cukup voor ngana, bae voor torang maupun di dalang TUHAN.

17    Noh kalo bagitu anggap jo kita pe tamang seiman, kong ngana tarima pa dia sama deng ngoni ada tarima pa kita.

18    Kalo dia so beking epes pa ngana ato so ba bon, maka depe kalakuan nyanda bae kase jo voor kita tanggung.

19    Kita, Paulus kase jamin deng kita pe tulisan tangan sandiri. Kita mo bayar samua - supaya kita nyanda mo bilang : ngana tanggong samua itu – kiapa bagitu karena ngoni so ba bon pa kita, bon ngana pe diri sandiri.

20    Iyo sodara, semoga ngoni berguna pa kita di dalang TUHAN: kase sanang kwa pa kita di dalang Kristus!

21    Deng percaya ngana pe taat sampe, kita tulis ini voor ngana. Kita tahu noh, lebe dari kita ba minta ini ngana mo beking.

22    Kong di kamudian hari kase tampa  ba singgah lei pa kita, karena kita ba harap ngana pe doa kita mo bale ulang pigi pa ngana.

1: 23-25 Tabea

23    Tabea voor ngana dari Epafras, kita pe tamang panjara karena Kristus Yesus,

24    Deng dari Markus, Aristarkhus, Demas, dan Lukas, kita pe tamang-tamang bakarja.

25    Pakatuan wo pakalowiren dari TUHAN Yesus Kristus salalu deng ngoni pe roh.

Nency A Heydemans Maramis

22:00

6 Juni 2012